గ్లోబల్ వేదికపై భారత ప్రతిభ.. యాపిల్ అవార్డుల రేసులో మన యాప్‌లు.. ప్రత్యేకతలివే!

ప్రపంచ టెక్ దిగ్గజం యాపిల్ ఏటా నిర్వహించే ప్రతిష్ఠాత్మక ‘యాపిల్ డిజైన్ అవార్డ్స్ 2026’ ఫైనలిస్టుల జాబితాలో రెండు భారతీయ యాప్‌లు చోటు దక్కించుకున్నాయి. యాప్, గేమ్ డిజైన్‌లో సృజనాత్మకత, నూతన ఆవిష్కరణలు, సామాజిక బాధ్యతను గుర్తించే ఈ అవార్డుల కోసం ప్రపంచవ్యాప్తంగా పోటీ నెలకొంటుంది. ఈ ఏడాది మొత్తం 36 ఫైనలిస్టులను ఆరు కేటగిరీలలో ప్రకటించగా అందులో ‘కథా రూమ్’, ‘గిటార్ విజ్’ అనే భారతీయ యాప్‌లు ఉండటం విశేషం.

భారతీయ సంస్కృతికి పెద్దపీట: కథా రూమ్ 
‘సోషల్ ఇంపాక్ట్’ కేటగిరీలో ఫైనలిస్ట్‌గా నిలిచిన ‘కథా రూమ్’ యాప్, భారతీయ జానపద కథల స్ఫూర్తితో రూపొందించబడింది. పిల్లలకు నిద్రపోయే ముందు కథలు చెప్పే ఈ యాప్‌లో, సంప్రదాయ గోండ్ కళాశైలిని ప్రతిబింబించే చిత్రాలు, ఆకట్టుకునే సౌండ్ డిజైన్ ఉంటాయి. భారతీయ సంస్కృతికి, కథలకు ప్రాతినిధ్యం వహించేలా ఈ యాప్‌ను తీర్చిదిద్దారని ఆపిల్ ప్రశంసించింది. దేశీయ సంప్రదాయాలను డిజిటల్ రూపంలో ప్రపంచానికి పరిచయం చేయడంలో ఈ యాప్ కీలక పాత్ర పోషిస్తోంది.

అందరికీ సంగీతం: గిటార్ విజ్ 
‘ఇన్‌క్లూజివిటీ’ (అందరినీ కలుపుకొనిపోయే) విభాగంలో ఎంపికైన ‘గిటార్ విజ్’ యాప్‌ను, బిజోయ్ తంగరాజ్ అనే భారతీయ డెవలపర్ ఒంటరిగా అభివృద్ధి చేశారు. ఇది గిటారిస్టుల కోసం రూపొందించిన ఒక ప్రత్యేకమైన టూల్‌కిట్. ముఖ్యంగా అంధులు, ఇతర దివ్యాంగులు కూడా సులభంగా గిటార్ వాయించడం నేర్చుకునేందుకు ఈ యాప్ సహకరిస్తుంది. ఇందులో వాయిస్‌ఓవర్ ఇంటిగ్రేషన్, డైనమిక్ టైప్ సపోర్ట్ వంటి అత్యాధునిక ఫీచర్లు ఉన్నాయి. పిచ్, కార్డ్స్, వేళ్ల స్థానాలపై యాప్ స్పష్టమైన వాయిస్ గైడెన్స్ ఇస్తుంది.

ఏటా యాపిల్ డిలైట్ అండ్ ఫన్, ఇన్‌క్లూజివిటీ, ఇన్నోవేషన్, సోషల్ ఇంపాక్ట్ వంటి వివిధ కేటగిరీలలో అత్యుత్తమ యాప్‌లను ఈ అవార్డులతో సత్కరిస్తుంది. గతంలో కూడా 2025లో లూమీ, డెనిమ్, ఎవాల్వ్, 2024లో మెడిటేట్ వంటి భారతీయ యాప్‌లు ఫైనల్స్‌కు చేరాయి. తాజా పరిణామం గ్లోబల్ టెక్ ప్లాట్‌ఫామ్‌లపై భారతీయ డెవలపర్ల పెరుగుతున్న నైపుణ్యానికి, ఆవిష్కరణలకు అద్దం పడుతోంది.